Şair Nəsib Nəbioğlunun şeirləri “Planeta poetov” («Планете поэтов») məcmuəsində dərc edilmişdir
Moskva, 3 may (AzərTAc). Riqada Beynəlxalq Yazıçılar və Publisistlər Assosiasiyasının (BYPA) nəşri olan “Planeta poetov” (“Şairlər planeti”) silsiləsindən beşinci poetik məcmuə işıq üzü görmüşdür. Məcmuəyə 53 ölkədən 130 şairin, o cümlədən tanınmış şair Nəsib Nəbioğlunun şeirləri daxil olmuşdur.
Dünyanın müxtəlif guşələrində yaşasalar da, rus dilində yazıb-yaradan müəlliflər öz şeirlərində insan taleyindən, onun gündəlik qayğılarından, qəlbini çalğalayan məhəbbət hisslərindən, ümid və istəklərindən, nakam arzularından, Vətən və doğma dil həsrətindən yazırlar. Məcmuədə ispan, katalon, ingilis, Azərbaycan, polyak dillərində yazan şairlərin rus dilinə tərcümələri də yer almışdır. Müəlliflər arasında Rusiya, ABŞ, Kanada, İspaniya, Serbiya, Fransa, İngiltərə, Avstriya, Polşa, Baltikyanı və bir çox digər ölkələrin şairləri vardır. Rus dilində yazan bu insanları rus dilinə və mədəniyyətinə məhəbbət birləşdirir.
Məcmuədə Azərbaycan layiqincə təmsil olunmuşdur. Tanınmış şair, BYPA-nın üzvü, Azərbaycan Yazıçılar Birliyinin Moskva bölməsinin üzvü, “Planeta poetov” məcmuəsinin oxucularına yaxşı tanış olan Nəsib Nəbioğlu öz yeni şeirlərini təqdim etmişdir.
“Planeta poetov-5” 40-dək poeziya, nəsr və publisistika toplusuna malik BYPA kitabxanasını zənginləşdirəcəkdir. Belə nəşrlərin sayı ilbəil artır. BYPA hazırda haqlı olaraq dünyanın ən iri yaradıcılıq qurumlarından biri sayılır. Qurumda dünyanın 58 ölkəsindən mindən çox yazıçı, şair və publisist təmsil olunmuşdur.
Asya Hacızadə
AzərTAc-ın xüsusi müxbiri
Moskva
- Yorum yapmak için giriş yapın