Həsrətlə gözlədiyimiz baharın ilk günü soyuq və qarlı Moskvada yaşayan şairəmiz Afaq ŞIXLI üçün uğurla və sevinclə başlayıb.

Kövrək şeirlərin, dəyərli publisistik yazıların və maraqlı hekayələrin müəllifi olan Afaq xanım Azərbaycan Jurnalistlər Birliyinin üzvü olub.

Qeyd etmək istəyirik ki, yaxın günlərdə şairənin daha iki yeni: "Dostlarım, mənə də bahar göndərin!" (türk), " Ömrümün beşinci fəsli" (azərb.) adlı kitabı işıq üzü görəcək.

Afaq Şıxlının son şeirlərindən birini oxuculara çatdırmaq istəyirik.

...BIR DƏ, SƏNIN DÖNÜKLÜYÜN

Ruhu itmiş bədən kimi küçələri dolaşıram...

 Sənsizlikdə

 boş yerini doldurmağa alışıram;

 Yeni zinət əşyaları...

Təzə paltar...

 Evimə də yeni-yeni şeylər alıb

 hər bir yanı süsləyirəm, yanır par-par.

 Gör bir nəylə ürəyimi soyuduram!

 Fərqi nədir?

 Nə alsam da, nə tapsam da

öz dünyama yenə sənsiz qayıdıram.

O axşamdan

məni tamam dəyişiblər...

Həsrət,

yalan,

...bir də sənin dönüklüyün -

 əlbir olub ürəyimlə döyüşüblər.

Məhəbbətin yoxdu daha!

Uduzmuşam!

Və o axşam

gözümüzə baxa-baxa

arzuları yox eləyib arxamızca gülüşüblər...

Sənə - dinclik, mənə - zülüm

bölüşüblər...

 Ruhu itmiş bədən kimi küçələri dolaşıram.

 Ölü olub,

 diri kimi görünməyə çalışıram.

 01.03.13.